«ԿՈՄԻՏԱՍ ՎԱՐԴԱՊԵՏԻ ԱՆՁՆԱԿԱՆ ԳՐԱԴԱՐԱՆԸ»
31 Հուլիսի 2023![komitasMuseum](https://komitasmuseum.am/wp-content/uploads/2023/07/dytejsglnkapjlfiouvq-680x400.jpg)
«Կոմիտաս Վարդապետի գրքերն ու գույքերն իմ կարծիքովս պետք չէ ծախվին, այլ ամբողջությամբ պահվին, որպեսզի օր մը Երևանի Ազգային թանգարանը դրվին, այն սենյակում կամ բաժնին մեջ, որ Կոմիտասին պիտի հատկացվի անշուշտ», – գրել է Արշակ Չոպանյանը։
Ժամանակակիցների վկայությամբ՝ ուր էլ նա լիներ, անպայման այցելում էր տեղի բոլոր գրախանութները և նոտաների կրպակները՝ հարստացնելով իր գրադարանը նոր հրատարակություններով։ Կոմիտաս Վարդապետի խիստ ընդգրկուն անձնական գրադարանը մենագրությունների, գիտական հանդեսների, գեղարվեստական, նոտային, երաժշտագիտական և այլ գրքերի, պարտիտուրների, կլավիրների, դասագրքերի, ձեռնարկների ու ժողովածուների հարուստ ու բազմաան հավաքածու է։ Այն Հայաստան է տեղափոխվել 1933 թ․ և պահվում է Ե․ Չարենցի անվան գրականության և արվեստի թանգարանում։
Կոմիտասի թանգարան-ինստիտուտի և Ե․ Չարենցի անվան գրականության և արվեստի թանգարանի համատեղ այս երկլեզու հրատարակությունը ներկայացնում է Կոմիտասի անձնական գրադարանի գրքերը՝ բաժանված ըստ ժանրերի, ինչպես նաև ուշադրություն է սևեռում Կոմիտասի՝ ձեռագիր նշումներ պարունակող նմուշների վրա։
Գիրքը հրատարակվել է 2022 թ., աշխատասիրությամբ Մարինե Հարոյանի, Լիլիթ Հարությունյանի, Անի Մուշեղյանի, Նանե Միսակյանի և Դանիել Երաժշտի։ Այն կարելի է ձեռք բերել Կոմիտասի թանգարան-ինստիտուտի գրախանութից։