Երաժշտագետ, արվեստագիտության թեկնածու, ՀՀ Մշակույթի վաստակավոր գործիչ, Երևանի Կոմիտասի անվան պետական կոնսերվատորիայի պրոֆեսոր, Երևանի Գեղարվեստի պետական ակադեմիայի դասախոս, ՀՀ կոմպոզիտորների միության վարչության անդամ, Փարիզի «Արարատ» միջազգային ակադեմիայի թղթակից անդամ:
2009 թ. ՀՀ ԳԱԱ Արվեստի ինստիտուտում պաշտպանել է ատենախոսություն՝ «Բալետային դրամատուրգիայի տարածագրաֆիկական վերլուծության հնարավորությունները» թեմայով։ Բազմաթիվ հոդվածների հեղինակ է, որոնք վերաբերում են երաժշտական թատրոնին, կատարողական արվեստին, կոմպոզիտորների ստեղծագործություններին, անհատական ստեղծագործական դիմանկարներին: Հեղինակ է ռադիոհաղորդումների և այլ նախագծերի, այդ թվում՝ հանրագիտարանների և զանազան ժողովածուների:

«ԿՈՄԻՏԱՍԻ ԿԵՐՊԱՐԸ ԷԴԳԱՐ ՀՈՎՀԱՆՆԻՍՅԱՆԻ «ԱՆՏՈՒՆԻ» ԲԱԼԵՏՈՒՄ»

Հայ կոմպոզիտոր Էդգար Հովաննիսյանի «Անտունի» (1969) բալետը նվիրված է Կոմիտասի 100-ամյա հոբելյանին: Սույն հետազոտությունը ներկայացնում է անդրադարձը Կոմիտասի կերպարին՝ բալետի գլխավոր հերոսի` Անտունու գեղարվեստական կերպարի միջոցով: Բալետը բաղկացած է երկու գործողությունից՝ հնգական պատկերներով: Առաջին գործողությունը բացահայտում է գլխավոր հերոսի ստեղծագործական էությունը, սերը, անձնական զգացմունքային աշխարհը: Երկրորդ գործողությունը կտրուկ հակադրվում է առաջինին՝ ներկայացնելով բռնություն, վիշտ, տառապանք՝ կապված Հայոց ցեղասպանության հետ: Բալետի վերլուծությունը կատարված է իմ կողմից ստեղծված տարածագրաֆիկական մոդելավորման մեթոդով, որը հնարավորություն է տվել վերլուծելու ստեղծագործության կառուցողական և դրամատուրգիական առանձնահատկությունները՝ արտահայտված և համակարգված չորս բազմամակարդակ, բազմաշերտ գծանկարների միջոցով: Այս ստեղծագործության հայելանման-համաչափ ձևակառուցվածքը առանձնանում է ռացիոնալ, տրամաբանական չափանիշներով և ներդաշնակությամբ: